عارفين يعني ايه اسكندريه !! – بقلم : سامح لطف الله
اسكندريه سر كبير ميعرفهوش غير أهلها
اسكندريه يعني الدنيا ترخ على دماغكـ وانت ولا في دماغكـ
اسكندريه يعني ريحه اليود في عز الشتا تعدل مزاجكـ
والبحر عمال يطش في الصخور قدامكـ
جربت تبدأ يومكـ بسندوتشين فول وفلافل من عند محمد احمد او جاد في محطه الرمل او سندوتش جبنه تركي و بيض بالبسطرمه من عند البان سويسرا
جربت تتمشى في محطه الرمل والدنيا بترخ وانت ماشي مستمتع وهي بترخ على راسكـ وبتاكل فشار
جربت تروح تتغدى عند عبده فرج في المنشيه او عند زفير في الماكس او قدوره في بحري او حتى شعبان في المنشيه احلى اكله سمكـ
جربت فته الكوارع من عند الصفتي او الفسيخ من عند سلطان الفسيخ بتاع العطارين
جربت احلى هريسه بالقشده من عند صابر او الحلبي تحلي بقكـ
جربت بيتزا شيجابي في محطه الرمل وحته جاتوه عند بسترودس ولا الصعيدى..
جربت تقعد على قهوه والي في كامب شيزار او قهوه انح في بحري وتشرب شاي في الخمسينه بالنعناع طيب بلاش خليها واحد حلبه حصى جربت تاكل ورق عنب من عند الصفواني في الابراهيمية؟
كل ده والدنيا عماله ترخ على دماغكـ وانت ولا في دماغكـ
جربت تشرب كاكاو ساقع في عز البرد من عند البن البرازيلي في محطه الرمل
جربت شويه كسكسي بالمكسرات واللبن من عند الشيخ وفيق ……..ورز بلبن بالجيلاتي من عند صابر او عند عزه ومكرم واللي يجي في بالكـ
جربت شويه سوداني مملح من عند مفيد ولب اسمر من طرطوسيه اللي في محطه الرمل وانت بتتمشى مع صحابكـ …
جربت لما تحب تتعشى انت وصحابكـ تطلع تاكل كبده اسكندراني وحلويات وقلوب وسجق من عند صالح فتوح ولا سامى او وهبه وتحبس بالعصير من عند طلعت اللي قدامكـ
او تروح تشرب احلى خروب او عصيرقصب من عند سامي او عصير مكه انت واحبابكـ
يومكـ مش حيخلص لو انت صاحي ومش جايلكـ نوم لان اسكندريه للصبح صاحيالكـ
اطلع على المعموره اجر عجل ولف المعموره كلها وهي برده بترخ على راسكـ
جربت تكون هموم الدنيا كلها فوق راسكـ وتقعد على صخور البحر ساعه تنسيك كل همومكـ
جربت كوبري ستانلي في عز الشتا وام كلثوم بتغني في كاسيت عربيه الترمس ومش لاقي مكان تستخبى من الشتا وانت بتاكل الترمس او كوز الدره بيندهلكـ
رحت جامع ابراهيم او المرسي ابوالعباس صليت فيهم ركعتين تناجي فيهم ربكـ
لو مجربتش كل ده يبقى مجربتش تعيش عيشه الاسكندرانيه
اسكندريه يعني اسرار كثيره اوي ولانها اسرار حتفضل اسرار الاسكندريه ولا تقبل الانتهاكـ
