حاول تفرح – بقلم : عبدالحميد وهبه
عبدالحميد وهبه
حاول تفرح
وإن ماقدرتش تسعد نفسك
ماتخليش للأحزان مطرح
حاول تفرح
حاول تنسى اللى فى يوم باعك
واللى بيظلم واللى بيجرح
حاول تفرح
حاول تخلص م الأحزان
ماتخليش للهم مكان
أصل الهم بيقتل صاحبه
وينسّيه الفرحة كمان
حاول تهرب من أوهامك
إنسى الحزن وعيش أيامك
تلقى الفرحة صاحبت دربك
والأيام ضحكت قدامك
وإن ماقدرتش يوم تتأقلم
عيش بخيالك وإحلم وإسرح
حاول تفرح حاول تفرح
حاول دايماً تبنى بإيدك
الحاجه اللى تملّي تفيدك
هتعلّي فى شأنك وتزيدك
وتخليك دايماً فرحان
حاول تنسى أو تتناسى
الناس الوحشة الهلاسة
الموضوع محتاج لدراسة
علشان تقدر ع النسيان
حاول دايماً ترسم فرحة
وإزرع بيها جناين طارحة
تهزم بيها الدنيا الجارحة
وتنور دربك على طول
خليك فاكر دايماً إنك
فرحة عمرك ضاعت منك
ماتخليش الأحزان تاخدك
لطريق صعب يكون مقفول
وإن ماقدرتش يوم تتأقلم
عيش بخيالك وإحلم وإسرح
حاول تفرح حاول تفرح
——————————-
اهداء الي صديقي \صابرحجازي
