من فوق حصان الوجع – بقلم : رمضان فؤاد السيد وفا
رمضان فؤاد السيد وفا
من فوق حصان الوجع
أقع
وأركب وأقع
مراجيح الدنيا بحالهـا
بالطول والعرض وبس
ومرجيحتي أنا لوحدي
من فوق لتحت وهـس
من فوق لتحت
وتخـت المياتم عـزف
آخرنفس ف الصوت الهش
والوش
كش من المعاني السوء
والغـش
فش من الحواري الضيق
والصبر رش العيون بالعما
والكل صابه العما
والـصدر آه بيضيق
والفقر حش الضهور مننا
والنحس نام ف البيت
والذل داس أرضنا
والبوم سكن لي الغيط
والحل إيه يا ناس
شابب ف داري نار
شاكي وباكي ليلاتي
يسمعني جار الجار
مجبور أنا أداري
عشان أصون داري
وأقـوم أصلي
يصلي حكمك العادل
يمكن أزين هدمتي
يمكن أكون راجل
وأقوم أفـش الهيافة
ف إللي عرف دندش
وأصلب جميع النواحل
مدام أخوه كرش
وأهـش عـش البلابل
وأنادي حدادي الليل
تسكن معايا العش
وغيري مين دا يهش
هـاتوا شيوخ البلد
توصف لنا حكمة
عشان دموع الولد
بتبل ف الهدمة
حبة أمل تحدفه
علي بر مش خالي
خايب وسايب مكانه
باصص لفوق عالي
وبنت شيخ الطريـقة
تظهر علي الفيديـو
أخرتنا إيه يا ناس
أولنا كان راديـو
ملعون لسان الخيابة
وإلـلي يآمـن له
يقعد في شمس الغيطان
ويفلي في قمله
معشوق عشق عشقته
أصل الولـد خايـب
منشور مع هدمته
علي حبل كان دايـب
قلب الهوى سحنته
ضحكت عليه القرايب
معشوق عروسة الجبل
بيحارب الترحال
راكب حصان الوجع
وسنين علي دا الحال
شله صدام الغجر
شيله تقيل يا خال
يللي رماك الزعـل
بين المداين رُد
رد الزعل ف العمل
بيشد حبل الـود
خسارة أمل يا ناس
هي نهاية المطـاف
ونلف لف الصبايا
بين العرايا لحاف
مقسوم تكون لقمتي
بين الغلابة حاف
مين فيكو شاف بلوتي
مين دا إللي حب وخاف
ساكن سرايا البلد
وإخواته في عشة
علي إية يكون العتب
مدامه خان عيشنا
مدام معاه العصايا
إللي عصاه يدي له
مدام يهاود ويسكت
يقطع له في ديله
ينكش جحور الفيران
يردم سواقي النمل
ومن دقنه يفتل له
لو يرقص يطبل له
ويعـد لحد المية
يخليه يصطاد ف المية
ولو ما عرفشي يصيد
ينزل وياه يعكر له
وخاطري أقولك كلمة
مربوطة بسر الكون
لو ما إعرفتش تضحك
خلاص الدنيا تهون
إيه يا دموع الولايا
أهو كلنا مساكين
حالفين ما نرفعشي راية
وف الكلام ماسكين
تيجوا نزور السرايا
ولا البيوت الطين
الفرش أهو ولع
والصالة والإوضتين
رحت أشوف البرابـر
ما لقتش غير بيضتيـن
هي البيضة ف زمنا
مقسومة علي الولدين
آه يالاموني يالاموني يا لامونى
وحياة سيدي الديداموني
وولاد الحضرة والفتة
لألف معاها كام لفة
وأهي لقمة
وأهي نومة
وإلهي تقوم القومة
مدام شيوخ البلد
فرشوا لنا دى الحكمة
عشان دموع الولد
بتبل ف الهدمة
______________________
رمضان فؤاد السيد وفا_ مصر
عضو اتحاد كتاب مصر
عضو رابطة الزجالين وكتاب الأغاني
رئيس النادي المركزي بالشرقية
رئيس نادي أدب قصر ثقافة فاقوس
———————————
___[] المؤتمر الأوّل لرابطة المثقفين الأفارقة []__
* الإبداعُ الإفريقي المعاصر
